هناك دائماً مساحة أمنة، ولكن علينا أن نتكلم ونعبر عن مشاعرنا ونطلب المساعدة.
“كل ست تستحق الدعم النفسي بصي، الحياة مش سهلة أبدًا كل واحدة فينا بتمر بمطبات وتحديات مختلفة في مراحل عمرها المختلفة، من أول ما نكون بنات صغيرين، للمراهقة، للشباب، والجواز، والأمومة، ولحد ما نكبر. في كل مرحلة، بتكون في ضغوط وتوقعات كتير علينا. ممكن تكون الضغوط دي من العيلة، أو الشغل، أو المجتمع”.
“ممكن تكون ضغوط إنك لازم تكوني مثالية في كل حاجة: زوجة مثالية، أم مثالية، موظفة شاطرة، وبنت مطيعة كل ده بيخلي الست محتاجة دعم نفسي، محتاجة حد يفهمها ويحتويها من غير ما يحكم عليها”.
“ليه الدعم النفسي مهم أوي؟ الدعم النفسي مش رفاهية، هو حاجة أساسية زي الأكل والشرب بالظبط، لما الست بتاخد الدعم اللي هي محتاجاه، ده بيأثر بشكل إيجابي على كل حاجة في حياتها، بيخليها أقوى، وعندها قدرة أكبر إنها تواجه المشاكل، بيساعدها إنها تفهم مشاعرها وتتصالح مع نفسها، بيخليها تعرف إن مش عيب أبداً إنها تكون ضعيفة أحيانًا، أو إنها مش قادرة تكمل، لما الست بتلاقي مساحة آمنة تتكلم فيها عن مشاعرها، ده بيخفف عنها الضغط النفسي الكبير اللي ممكن تكون حاسة بيه ممكن يكون الدعم ده من صديقة قريبة، أو فرد من العيلة، أو حتى معالج نفسي متخصص، الأهم هو إنك تتكلمي وماتفضليش ساكتة”.
“السكوت عن المشاعر ممكن يؤدي لمشاكل نفسية أكبر زي الاكتئاب والقلق، إنتي مش لوحدك أهم حاجة لازم تعرفيها إنك مش لوحدك. ملايين الستات في كل مكان بيحسوا بنفس المشاعر والتحديات اللي بتحسي بيها، إنك تطلبي مساعدة أو تتكلمي عن اللي جواكي ده مش ضعف، بالعكس، ده أكبر دليل على قوتك وشجاعتك”.
“الاعتناء بصحتك النفسية هو أول خطوة للعيش بسعادة وسلام، ابحثي عن الدعم اللي يناسبك، سواء كان مجموعة دعم، أو معالج نفسي، أو حتى صديقة موثوق فيها، مش لازم تتحملي كل حاجة لوحدك إنتي تستاهلي تعيشي مرتاحة وسعيدة”.
جيهان الأصيل
اخصائى الدعم النفسى ورئيس مجلس أمناء مؤسسة كانسر كير
