نتفق أو نختلف على تمكين المرأة… ده طبيعي.
في رجالة بتقول: “اقعدوا في البيت… وسيبوا المكان لينا، بلاش تزاحمونا في كل حاجة.”
وفي ستات بتقول: “ده حقنا… وإحنا شقينا سنين طويلة لحد ما وصلنا لأحلامنا، مش هنرجع لورا.”
الاختلاف في الرأي مش مشكلة. المجتمع دايمًا فيه وجهات نظر مختلفة، وده جزء من تطوره.
لكن في حاجة لا ينفع نختلف عليها أبدًا…
وهي إن العنف ضد المرأة مرفوض… مرفوض… مرفوض.
لأن العنف مش “رأي”، ومش “وجهة نظر”، ولا “طريقة تربية”.
العنف جريمة… وتكلفته على البيت والمجتمع أكبر بكتير من اللي بنشوفه.
الست مش منافس للرجل… الست شريك.
وتمكين المرأة مش معناه إنها تاخد مكان حد، بالعكس… معناه إن المجتمع يبقى أقوى، البيت يبقى افضل والاقتصاد يتحسن.
الست اللي بتتعب وتتعلّم وتشتغل مش بتزاحم…
هي بتضيف، بتبني، وبتفتح باب جديد للنجاح.
إنما العنف؟
ما بيبنيش… ما بيضيفش… ما بيعملش غير إنه يكسّر، ويهدّ، ويضيّع مستقبل أسر كاملة.
علشان كده…
نتفق أو نختلف في دور المرأة… لكن نتفق إن العنف ضدّها خط أحمر.
ومافيش أي مبرر — تحت أي ظرف — يخلي العنف مقبول أو مبرر.
مجتمع بيحترم المرأة… مجتمع بيحترم نفسه.
ومجتمع بيحمي المرأة… مجتمع بيحمي أجياله.
