التوعية بأهميه الكشف والفحص المبكر لازم توصل لكل الناس عشان تبقى بسيطة ومفهومة.
قبل وبعد.. عشان الأمر يمُر بسلام، الموضوع مِش حاجة نخاف منها، هو حاجة لازم نعرفها ونواجهها بوعي.. بنتكلم عن سرطان الثدي. العنوان بتاعنا بيقول
“قبل وبعد.. حتى يمُر الأمر بسلام”، وده عشان نِفهم إن الموضوع له خطوات، ولو عملناها صح، إن شاء الله كل حاجة هتبقى تمام.
“قبل”… اعرفي جسمك!
“قبل” بتبدأ معاكي من سن البلوغ. أيوه، من وإحنا صغيرين، المفروض إننا نعرف شكل وطبيعة أجسامنا. ودي مسؤولية الأمهات تحديدًا. الموضوع مش عيب ولا حرام إن البنت تتعلم إزاي تفحص نفسها وتشوف شكل ثديها الطبيعي عشان أي تغيير يحصل بعد كده تلاحظه بسرعة. دي اسمها الفحص الذاتي للثدي.
ليه نعمل كده؟
عشان لو حصل أي تغيير في الشكل، أو الملمس، أو ظهرت أي كتلة، نعرف إن ده مش الشكل الطبيعي بتاعنا ونروح نكشف فورًا.
خدى بالك : طبيب أمراض النسا اللي بتروحيله بشكل دوري، مِش بيغني خالص عن الفحص والكشف المبكر بتاع سرطان الثدي. هو دوره مختلف. لازم يكون فيه وعي بأهمية الفحص المُتخصص.
اعشان الموضوع يبقى سهل على الكل، المبادرة الرئاسية للكشف المبكر عن سرطان الثدي موجودة وبتوفر الكشف مجانًا! المبادرة دي لكل أطياف المجتمع، ومفيش حجة إن الفلوس ممكن تكون عائق.
مرحلة “بعد”… قرار سليم ودعم نفسي!
لو الفحص طلع فيه حاجة أو الدكاترة شكوا في أي ورم، الـ”بعد” بتبدأ هنا. ودي مرحلة محتاجة هدوء وتفكير صح:
ا التخصص أهم من أي حاجة: أهم خطوة: اوعي تاخدي أي قرار يخص جراحة أو علاج من غير ما ترجعي لـطبيب الأورام المُتخصص أو اللجنة الطبية في المستشفى. مِش أي دكتور، لازم يكون دكتور أورام.
رأي طبي تاني: من حقك، بل ده الأفضل، إنك تاخدي رأي طبي تاني (Second Opinion). يعني تروحي لدكتور أورام تاني أو مركز تاني عشان تتأكدي إن التشخيص وخطة العلاج دي هي الأنسب لحالتك.
المعلومات من أهلها: لو لا قدر الله حصلت إصابة، اوعي تسمعي كلام حد مِش فاهم! لازم تاخدي كل معلومات العلاج والتطورات من الطبيب المعالج أو من أهل الخبرة اللي هما مُناصري المرضى اللي مروا بنفس التجربة وممكن يدعموكي.
نفسيتك هي الدوا: اوعي تنسي إن الحالة النفسية في رحلة العلاج لا تقل أهمية عن الدواء نفسه. الدعم النفسي والبعد عن الإحباط بيفرقوا كتير في الاستجابة للعلاج.
عشان الأمر يمُر بسلام
السلام بيجي بالـوعي، وبالـسرعة في التصرف، وبالـثقة في المتخصصين. مِش بالخوف أو الكسل أو تجاهل المشكلة.
افحصي نفسك بنفسك كل شهر، واكشفي دوري في المبادرة الرئاسية مجانًا لو عديتي سن الأربعين. صحتك أمانة، وحياتك غالية.
“قبل وبعد.. حتى يمُر الأمر بسلام”.
جيهان الأصيل
اخصائى الدعم النفسى ورئيس مجلس أمناء مؤسسة كانسر كير
